KLEI TRUH 04 Mlan 11 Thun 2010

Aê khua kơk ksơr  nao bi mdĭ ai hlăm klei đăo leh anăn yal dliê kơ klei ñu hiu bi kin, kơ anak buôn sang Đegar ti Greensboro, NC  hlăm USA.

Hruê 23 Mlan 10 Thŭn 2010, Aê khua kơk ksơr nao truh kơ Sang Aê Đegar, 3016 Pinecroft Rd, Greensboro NC 27407. Ti anei ñu mtô mblang hlăm klei đăo leh anăn yal dliê kơ klei ñu tuôm hiu bi kbin hŏng khua mua lăn ala kơ pă boh buôn prong anak buôn sang Đegar dôk jưh êđăp hlăm Čar Amerik. buôn Charlotte, Newbern, Raleigh leh anăn Greensboro.

Aê khua kơk ksơr dôk mtô mblang anak buôn sang  hlăm klei đăo

Aê khua kơk ksơr, êlao kơ ñu yal dliê kơ klei ñu hiu bi kbin hŏng khua mua lăn ala, ñu mtô mblang kơ anak buôn sang hlăm êlan klei đăo, čiăng kơ anak buôn sang knang leh anăn kkuh mpŭ kơ Aê diê hŏng ai tiê sĭt suôr;  kơyuadah jih bruă ñu ngă mơng anei kơ tuôn ñu amâo knang kơ ñu pô ôh biădah ñu knang knong kơ Aê Diê. Sơnan ñu čiăng kơ anak buôn sang knang kơ Aê Diê msĕ mơh.  Aê khua Kơk Ksơr čiăng kơ anak buôn sang kkuh mpŭ leh anăn knang kơ Aê Diê hŏng ai tiê sĭt suôr amâo djŏ ôh anak buôn sang kkuh mpŭ leh anăn knang kơ mnuih ôh, kơyuadah mnuih amâo mâo klei dưi mtlaih anak mnuih mơng klei soh ôh, knŏng Aê Diê mâo klei dưi bi tlaih anak mnuih mơng klei soh. Msĕ mơh aê khua mtă lač đăm anak buôn sang mâo klei huĭ hyưt nanao ôh, kơyuadah klei huĭ hyưt anei yơh drei dôk kbưi mơng Aê Diê, Ară anei hin mâo lu anak buôn sang Đegar drei hlăm ala kngư adih, huĭ kơ arăng, tơdah arăng lač nao hlăm Ea, hlăm pui, hlăm čư leh anăn lu klei mkăn anak Mnuih mplư čiăng kơ phung drei dôk kbưi mơng Aê Diê, phung drei nao mơh.  Aê khua kơ ksơr lač kñăm ktang čiang jih jang anak buôn sang Đegar drei amâo huĭ kơ mnuih biădah  brei drei huĭ mp kơ Khua Yang. Sơnan kơh drei dưi mâo klei bi mtlaih mơng klei jhat bai lăn ala.

Klei Aê khua kơk ksơr hiu bi kbin hŏng arăng.

Aê khua kơk ksơr nao bi kbin mbĭt hŏng phung khua mua lăn ala ti knơng bruă Čar EU.  Hlăm Hruê 5 Mlan 10 Thŭn 2010, ñu nao tal anei arăng tŭ drông hŏng mpŭ kơ ñu lu hloh kơ ñu tuôm hiu bi kbin hŏng arăng ti tluôn, leh anăn ñu bi kngar lu hloh kơ ñu hiu bi kbin hŏng arăng ti anôk mkăn.

Hlăm klei blŭ ti anăp khua ĕmua knơng bruă čar EU aê khua Kơk Ksơr  blŭ kñăm nao kơ klei ktư juă truh tơl kơ phung đăo ti Vietnam; msĕ si anak buôn sang Đegar hlăm ala kngư, amâo mâo klei êngiê kkuh mpŭ kơ Aê Diê ôh, leh anăn lu phung ling kahan mŭt nao hlăm buôn sang anak Đegar hŏng čăm biêng mă krư kđal hlăm sang war mnă nanao amâo mdei kơyua  digơ Đăo kơ Aê Diê. Tơdah ih čiăng kơ thâo săng ênŭm hǐn, ih ktĭt ti anei http://montagnard-foundation.org/wp/2010/10/10/869.