KLEI CIH HRUE 6 MLAN 10 THUN 2010

KLEI IÊO MTHƯR MƠNG HLOAI RČOM.

--Ơ jih jang Amiêt awa khua mduôn amuôn adei êkei leh anăn mniê, hlăm ala Kngư leh anăn hlăm Čar USA! kâo čiăng hưn brei kơ jih jang phung drei thâo  kơ klei gal phung drei knŭk kna Vietnam mă bi đuê jih.

Phung drei mâo klei gal mă tŭ klei hơk mơăk mbĭt hŏng êpul amâodah hjăn, jih jang klei gal mnuih leh anăn phŭn klei êngiê mâo thao kral leh hlăm kjar Bŭt Čar Hgum, hră lăn ala hưn mdah kơ klei gal Anak Mnuih leh anăn hră klei Bhiăn kơ klei gal Mnuih ti Bŭt Čar Hgum.

• Grăp čô phung drei jing êngiê leh anăn mtăp mđơr msĕ hŏng jih jang êpul Mnuih mâo klei gal jing êngiê mơ̆ng djăp mta  klei bi kah hlăm phung drei yua klei gal, boh nĭk ñu phung drei dưi yua klei gal phung drei jing pô lăn phŭn, amâodah anăn djuê ana phung drei jing.
  
• Phung drei jing Mnuih pô lăn, mâo klei gal kơ klei gĭt gai mă pô. kyuadah mơng klei gal anăn yơh phung drei mâo klei êngiê ruah mă êlan hdră kđi Čar phung drei pô leh anăn êngiê tui duah ngăn dưn kơ phung drei pô, êngiê hlăm klei rŭ mdĭ êpul Mnuih hŏng Bhiăn juăt phung drei pô.
  
• Phung drei jing Mnuih pô lăn, mâo klei gal yua hlăm klei gĭt gai mă pô, mâo klei gal kơ knŭk kna pô amâodah klei kiă kriê mă pô hlăm bruă ti krah phung drei,  leh anăn bruă hdang phung drei pô, msĕ mơh hlăm êlan mnơng yua čiăng mâo ngăn đah pŏk pioh êrăn hlăm bruă knŭk kna phung drei pô.
  
• Phung drei jing Mnuih pô lăn, mâo klei gal djă pioh leh anăn bi ktăng hdră kđi Čar klă mngač phung drei, bruă kđi, bruă ngăn dưn, bruă êpul Mnuih leh anăn bruă bhiăn juăt phung drei, êjai djă krơng klei gal phung drei mă bruă mbĭt djăp mta, tơdah phung drei čiăng hlăm bruă kđi Čar, bruă ngăn dưn, bruă êpul Mnuih leh anăn bruă bhiăn juăt hdĭp, hŏng knŭk kna phŭn.
  
• Grăp čô phung drei mâo klei gal kơ klei hdĭp, klei yuôm mnuih hlăm asei mlei, klei mĭn, klei êngiê leh anăn klei mgang kơ asei mlei pô. Phung drei mâo klei gal êpul dôk hdĭp mbĭt hlăm klei êngiê, klei êđăp ênang leh anăn hlăm klei iăt ênang msĕ hŏng Mnuih yuôm leh anăn amâo mâo sa mta dưi bi luč djuê ana phung drei, mbĭt hŏng klei mă mđuĕ Anak čô êpul phung drei kơ êpul mkăn.
  
• phung drei jing Mnuih pô lăn, leh anăn klei gal kơ amâo dưi mgô phung drei jing djuê ana êpul Mnuih mkăn amâodah bi rai hĕ bhiăn juăt phung drei. Brei knŭk kna mkŏ mjing sa mta mnơng dưi jing pioh mgang, leh anăn lŏ mkra bi djŏ: Ya klei ngă kliêng nao amâodah mjing kơ klei mă mđuĕ mơng phung drei knuih ghưm, phung drei jing Mnuih yuôm amâodah ênoh yuôm bhiăn juăt phung drei leh anăn Anăn djuê Mnuih phung drei jing; Ya klei ngă kliêng nao amâodah mjing kơ klei mă mđuĕ mơng phung drei lăn pưk hma, kmrŏng dhông amâodah mnơng yuôm  hlăm lăn phung drei.
  
• Ya mta klei mgô bam đuĕ buôn Sang mâo klei kliêng nao amâodah amâo bi myuôm kơ klei gal phung drei; Ya mta klei brei bi mlih nao amâodah bi mŭt nao kơ djuê ana mkăn; Ya mta klei mđung hiu klei blŭ čiăng bi mdĭ amâodah bi rung kơ klei djuê ana mde klei bi kah djuê Mnuih kliêng nao bi kdơng hŏng phung drei.
  
• Amâo mâo hlei pô dưi mduĕ Mnuih drei  mơng lăn pưk hma amâodah mơng kmrŏng dhông phung drei hŏng klei mgô. Amâo mâo hlei pô dưi mgô Mnuih phung drei nao dôk kơ anôk mkăn tơdah amâo mâo klei bi blŭ êmuh, leh anăn bi tŭ ư êlao  hŏng klei êngiê, klei bi tŭ ư hŏng klei kpă, bi djŏ hŏng ênoh lăn phung drei luč, leh anăn tơdah dưi, brei phung drei sơrăng dưi lŏ wĭt dôk ti lăn anăn.
  
• Phung drei  mâo klei gal bi êdah, yua rŭ mdĭ, mtô klei yang mngăt, klei đăo mơng bhiăn aduôn Aê phung drei, bhiăn êpul leh anăn klei mnăm huă phung drei; klei gal djă pioh, mgang, dưi mŭt hjăn hlăm anôk klei đăo leh anăn anôk bhiăn juăt phung drei; klei gal dưi yua gĭt gai mnơng phung drei pioh yua hlăm klei mnăm huă; klei gal lŏ bi wĭt asei mlei Mnuih phung drei. Knŭk kna duah êlan brei klei dưi mŭt amâodah brei wĭt mnơng phung drei pioh yua hlăm klei mnăm huă leh anăn asei Mnuih ăt dôk lŏ jing dŏ phung drei pô hŏng klei bi knar, hŏng klei mngăč leh anăn mnơng yua jing pioh rŭ mđĭ hlăm klei bi đru mbĭt hŏng Mnuih pô lăn čiăng đru msĕ si phung drei.
  
• Phung drei mâo klei gal mkŏ mjing gĭt gai hlăm kjar klei hriăm hră mơar leh anăn anôk pioh brei klei hriăm hlăm klei blŭ klei drei pô, hlăm êlan djŏ hŏng bhiăn juăt hdră mtô leh anăn hriăm. Grăp čô phung drei boh nĭk ñu phung hđeh êlăk, mâo klei gal mkŏ mjing jih jang adŭ bi hriăm leh anăn mnơng pioh mtô hlăm knŭk kna amâo mâo klei bi kah. Knŭk kna sơrăng bi đru mbĭt hŏng mnuih pô lăn msĕ si phung drei, duah klei mkŏ mjing čiăng kơ grăp čô phung drei, boh nĭk ñu phung hđeh yăp mbĭt hŏng phung dôk hdĭp ti êngao êpul pô, brei mâo êlan dưi, tơdah êlưih kơ klei bi hriăm hră mơar hlăm bhiăn juăt  drei leh anăn brei hriăm hlăm klei blŭ phung drei pô.
  
• Phung drei mâo klei gal kơ lăn pưk hma, kmrŏng dhông leh anăn djăp mta mâo hlăm dliê dŏ phung drei, bhiăn djă mâo leh mơng bhiăn aduôn Aê phung drei, arăng mă dôk, mă yua amâodah mă tŭ. phung drei mâo klei gal mkŏ mjing dŏ pô yua, rŭ mdĭ leh anăn gĭt gai lăn pưk hma, kmrŏng dhông, mnơng mâo hlăm dliê, jing mơng phung drei hŏng klei gal mơng bhiăn aduôn Aê mâo amâodah anôk phung drei bhiăn dôk, yua msĕ mơh dŏ mnơng phung drei mâo amâodah mnơng amra jing dŏ phung drei. Knŭk kna sơrăng brei klei thâo kral hlăm klei bhiăn, mgang lăn pưk hma, kmrŏng dhông leh anăn djăp mta mnơng mâo hlăm dliê, klei thâo kral brei tui hluê hŏng klei mpŭ kơ bhiăn juăt êpul, leh anăn kjar bhiăn Mnuih pô lăn čiăng đru msĕ si phung drei.
  
• Phung ling kahan amâo sơrăng dưi đuĕ hiu ôh hlăm lăn pưk hma amâodah kmrŏng dhông mnuih pô lăn msĕ si phung drei, mơng mâo klei dưi kyua Anăk ƀuôn Sang čiăng amâodah mdê kơ anăn mâo klei bi tŭ ư leh anăn klei kwưh akâo mơng mnuih pô lăn čiăng đru kơh dưi.  Knŭk kna sơrăng êmuh mblang hŏng Mnuih pô lăn čiăng đru, tui hluê êlan djŏ leh anăn boh nĭk ñu hŏng knŏng bruă phung bi ala kơ phung drei, êlâo kơ yua lăn pưk hma amâodah kmrŏng dhông phung drei hlăm bruă ling kahan đuĕ hiu.
  
• Phung drei jing Mnuih pô lăn, boh nĭk ñu knŏng lăn bŭt čar hgum kah mbha hĕ phung drei, mâo klei gal djă pioh leh anăn rŭ mđĭ êlan êrô êbat bi jĕ giăm leh anăn bi đru mbĭt, wăt hŏng bruă hlăm yang Mngăt, bhiăn juăt, hdră kđi čar, bruă ngăn dưn leh anăn bruă kơ êpul, hŏng grăp čô êpul pô msĕ mơh hŏng êpul nah dih knông lăn. Knŭk kna hlăm klei bi êmuh mdah leh anăn klei bi đru mbĭt hŏng mnuih pô lăn, sơrăng yua klei mkŏ mjing čiăng kơ dưi mâo klei yua leh anăn mâo mnơng yua kơ klei ngă tui klei gal.

Snăn jih jang klei găl phung drei anei knŭk kna Vietnam mă bi đuĕ jih, kyua anăn phŭn bruă MFI dôk ngă ară anei čiăng lŏ mă wĭt klei gal phung drei.
Kyua anăn ơ phung dôk mă bruă kơ roh! Brei diih mdei! Ơ phung dôk hlăm klei amâo thâo săng! Brei diih duah ksiêm! Leh anăn ơ phung dôk hlăm klei êdu awăt, brei diih bi ktang, čiăng kơ phung drei dưi lŏ mă wĭt klei găl drei mơng knŭk kna Vietnam.

Hloai Rčom. Email: hrcam2010@ymail.com