KLEI IÊO MTHƯR

KLEI IÊO MTHƯR
mơng Khua Pan Ko Phun Brua Atur Phun Anak Cu, Montagnard Foundation (MFI)

Ơ phung amiêt awa, khua mduôn, amuôn adei leh anan anak buôn sang khap hơ-ieng! Kâo ciang hưn mthâo hong jih jang anak buôn sang Degar drei hlăm Ala Kngu, koyua diih mâo klei jhong mă tu klei ruă knap mơng knuk kna Yuan klin căm biêng, kru kdal tăp năng bi mdjiê, ara anei jih jang car ti But Car Hgum thâo kral kơ djuê ana Degar drei jing Pô Lan sit ti Ala Kngu leh anan thâo sang klă kơ klei knuk kna Yuan klin ktư juă ngă mak bai ciang bi rai luc djuê ana Degar drei ciang kơ dinu dui mă tu lăn êa pưk hma aduôn aê drei kơ dinu pô.

Hmei jih jang êpul tui hlue Phun Bruă Atur Phun Anak Cu mao klei mpu sơnak kơ phung anak Degar drei jhong nao ngă klei ur krao hlăk lo 2 mlan 2 thun 2001 leh anan lơ 9-10 mlan 4 thun 2004. Leh anan, hmei jih jang hlam êpul Phun Brua mâo klei ênguôt hning mbit hong phung gap djuê anak buôn sang drei mâo anak cô ung kjar ma tu klei knuk kna Yuan klin căm biêng, kru kdal leh anan bi mdjiê kơyua klei dinu nao ur krao ciang bi edah klei jhat Yuan klin ktư jua anak buôn sang Degar drei kơ jih jang car ti lan ala anei.

Hmei phung tui hlue Phun Brua Atur Phun Anak Cư mbit hong anak buôn sang Degar drei dôk hdip ti Ala Kngư hdor min leh anan wah lac nanao kơ phung ayong adei amiêt awa drei at dôk hlam sang krư knuk kna jhat bai Yuan klin leh anan ko phung mô anak gap djuê dinu amâo mâo pô kap ciem rông ba.

Kâo ciang iêo kwưh kơ jih jang anak buôn sang Degar drei dăm drei mâo klei hyưt hui ôh kơ klei truh ko drei koyua klei hdip drei dôk hlam kie kngan Aê Diê Khua Yang drei. Biadah brei drei dôk kjap hlam klei dao leh anan knang kơ Khua Yang Aê Diê kjap phit hong klei wah lac amâo mdei kơyua knong hong Ae Die yơh drei sơrang dưi.

Brei drei thâo sang, aê êa drao amâo thâo mdrao ôh tơdah amâo mâo klei ruă mse sơnan mơh phung phat kdi amâo thâo phat kdi ôh tơdah amâo mâo kdi. Sonan yơh dam brei drei hui ôh kơ klei arang nga jhat kơ drei koyua klei jhat anan yoh brei klei găl ko phung phat kdi nao phat brei kdi drei.

Brei drei thâo sang, ktang knuk kna Yuan klin ngă jhat kơ drei prong mơh klei gal drei lo di, ktang knuk kna Yuan klin nga jhat kơ drei prong mơh klei soh knuk kna Yuan klin lo di, ktang knuk kna Yuan klin nga jhat kơ drei djal mơh phung phat kdi sơrang phat brei kdi drei. Sơnan yơh brei drei thâo săng klă kơ klei ktang drei kbiă hrie mơng klei drei jhong mă tu klei jhat arang ngă kơ drei.

Kâo ciang bi mdi ai tiê drei jih jang, dăm brei drei hui ôh, koyua bruă drei ngă anei drei ngă hong klei edap enang leh anan amâo djo drei hiu duah tle huak do dô arang ôh, amâo djo drei hiu duah mdjiê arang ôh leh anan kan drei ciang mdlưh knuk kna arang lei. Drei knong akâo kơ knuk kna Yuan klin brei dinu mdei cam biêng kru kdal bi mdjie anak buôn sang Degar drei amâo tuôm mâo klei soh, mpu brei kơ klei gal anak buôn sang drei kơ lan ea puk hma aduôn aê drei leh anan mpu brei kơ klei gal anak buôn sang drei kkuh mpu ko Aê Diê tui hlue klei bhian But Car Hgum. Biadah dinu lo nga jhat kơ drei ktang hin.

Sơnan yoh dăm brei drei hui ôh koyua bruă drei ngă anei amâo mâo sa mta klei soh ôh leh anan drei thao sit tơdah drei djiê drei sơrang nao dôk hdip mbit hong Aê Diê Khua Yang drei hlăm buôn jak nu ti dlông.

Elâo kơ kâo mjưh, kâo kwuh akâo ko Aê Die Khua Yang ciang kơ nu bi mngac brei klei min grap cô anak buôn sang Degar drei ciang kơ drei thâo sang kla brua Atur Phun Anak Cu drei dôk nga ara anei, bi kjap klei dao drei, bi mdi ai tie drei hlăm klei hgum mguôp, bi ktang klei drei knang ko Aê Diê leh anan dru ba drei hlam klei gir ma tu klei rua knap êjai dôk guôn hrue nu sơrang brei klei êngiê êdap ênang kơ anak buôn sang Degar drei, Amen.

Hưn mthâo

Hưn mthâo kơ jih jang hlapok “Anôk Trông Čhai” sơrang amâo lŏ dưm ti anei ôh jih thun 2006 anei kơyuadah biă dei mnuih hriê čih. Ara anei knong arang phung čih “SPAM” duič hriê čih. Tơdah ih mâo klei čiang thâo klă hĭn, akâo kơ ih êmuh ti hlapok@degar.org

Lač Jak kơ diih tuôm hriê čih leh anan dlăng ti hlapok anei.